Nagbigay ng pahayag ang pamahalaan ng Lungsod ng Maynila noong Sabado na haharapin nila ang dating kumpanya na naatasang mangolekta ng basura sa lungsod dahil sa hindi pagtupad sa kanilang mga tungkulin sa panahon ng Kapaskuhan.
Pinuna ni Mayor Honey Lacuna ang Leonel Waste Management Corp. na iniwan ang kanilang trabaho kasabay ng 400% na pagtaas ng basura na dulot ng mga selebrasyon ng Pasko at Bagong Taon.
“Rest assured, I will not let this sabotage pass and those responsible will be held accountable,” aniya sa isang pahayag.
Ayon kay Lacuna, ang mga kumpanyang MetroWaste at PhilEco Systems Corp. ay nagsimula nang mag-operate ng walang tigil upang linisin ang mga kalsada ng Maynila mula sa mga basurang naiwan.
“We will address the negligence of the previous garbage collector. Now, we have two contractors, MetroWaste and PhilEco, ensuring that the city is cleaned efficiently,” dagdag pa niya.
Hinimok din ng alkalde ang mga residente na mag-report ng mga basurang hindi nakolekta sa Department of Public Services o sa Task Force Against Road Obstruction upang agarang matugunan.